مش بالصدفة اخترت شعار حملتي الانتخابية لسنة ال 2018 :
” جبّة بشري نموذج للجمهورية القوية “
لان بالنسبة لإلي اذا حالفنا الحظ ،
ووصل حزب قوات لبنانية على سدة الرئاسة الاولى ،
أي وصل سمير جعجع وعمل رئيس جمهورية لبنان .
بتكون صورة لبنان على صورة قضاء بشري :
بتطبيق القانون وبناء المؤسسات والشفافية والانماء
والتجذرّ والنضال والصمود والحرية والكرامة ….
بكل بساطة : صورة لبنان القوي ، السيّد ، الحرّ ، المستقل
اللي عم نسعى نوصلّوا.
هالمسيرة اللي مبلشي من 1400 سنة ،
واللي كانت منطقة بشري ،
شعلتا بالايمان والنضال والمقاومة والصمود ،
بعدا مستمرة من جيل لجيل، مع اختلاف المراحل والظروف،
واليوم بتجسّدا القوات اللبنانية بكل تضحياتا ،
واللي عم تخوض مواجهات دفاعا ً عن وجودنا الحر ّ وعن بلدنا لبنان .
نعم ، المسيرة مستمرة ، وبالتزام ما بيلين مكملين ،
على مثال خطى رفيقنا المناضل ايلي كيروز ،
لنحمل معو ومش بعدو هالشعلة اللي ما بتنطفي .
من موقعي النقابي والحزبي والمهني ،
رح كمل مسيرة هالحلم اللي نرسمت لمنطقتنا ،
لنمحي تماما ً صورة السنين الطويلة من الاضطهاد والتهميش ،
وترجع هالمنطقة منارة ونفعـّل الدورة الاقتصادية ،
تتصير دايمه ومش موسميه ….
لحتى ولادنا يبقوا متجذرين بأرض القداسة والبطولة والشهادة .
