وأعود الى الارز أعود،
لا شئ معي الا الكلمات،
وكم أرزة وكان إنك ما تنسى يوم هاك البطل هالمتلك ولا لوم
بعدا أجواء ليلة مبارح محفورة عالمسرح
مسا الخير من الليلة التانية لمهرجانات الارز الدولية مباشرة عبر شاشة الـ MTV
الصورة الحلوة تحت هالنجمات وحدّ هالارزات من توقيع المخرج باسم كريستو.
اهلا وسهلا فيكن بأرض جبران.
يا ارض جبران يا ارض الموهبة
عزّك مجّد الله تراثك مكتبة
مندخل عليك بأجنحة متكسّرة
منرجع عواصف حاملة كتاب النبي.
واللي حملتنا التحية لفكر لجبران ابن الارز،
هي بنت الارز، بنت الأصالة والوفاء، بنت الانماء والانتماء.
السنة الماضية بعد غيبة 50 سنة،
أصرّت انو تكون التحية لرمز لبنان
الشرف والتضحية والوفا
كانت التحية وكل لحظة للجيش اللبناني.
السنة التحية من القلب لـ “جبران خليل جبران”
رافقتك مبارح بكلمة الافتتاح
كنت المصطفى الجايي من الجمال كرمال الحقيقة.
كنت القبطان اللي راجع بالسفينة ع برّ الامان،
حكيتي عن أسرار الدني متوّجة بفكر جبران.
كلنا فقير ولا غنيّ سوى الحياة،
اذا المحبة أومت اليكم فاتبعوها،
كنتي الصوت المرتاح، كنتي الندى
كنتي الحقيقة الصارخة وكنا الصدى
ونحنا الناس، راجعين الليلة كمان
نسهر معك ببلاد الارز اللي بفضلك ع هالارض رجعت أيام العزّ.
تحية من القلب لرئيسة مهرجانات الارز الدولية
سعادة النائب ستريدا طوق جعجع.
الموسيقى لغة الروح
شعار مهرجانات الارز الدولية
تحية للفرقة الموسيقية بقيادة المايسترو
تقديم نانسي
كان عمرا 7 سنوات لما وقفت لاول مرة ع مسرح وغنت رائعة الكبير زكي ناصيف:
نقيلي أحلى زهرة يا فراشة نقيلي،
زهرة بتلبق للشقرا على شعرا تشيكلي.
ومن يومتا لليوم بعدا فراشة ،
حلوة بتضوي بحضورا كل المسارح وأحلى المطارح .
والنجمة الطفلة صارت نجمة عالمية ،
وصلت الليلة ع مسرح الارز ، بعدما قدمت حفلة رائعة
على مسرح الاولمبياد بباريس .
زقفولا كتير بس مش أكتر ما رح نزقفلا نحنا …..
سفيرة الحب والنوايا الحسنة بالامم المتحدة ،
سفيرة الغنية الحلوة والحضور الرائع ،
نجمة النجمات …… نانسي عجرم .
من أرض الخير والتاريخ بعدنا معكن عبر الشاشة العريقة MTV
تحية لكل أسرة مهرجانات الارز الدولية
أكتر من 200 شخص على مدار السنة،
جهد وتعب ومثابرة لنجاح المهرجان،
انشالله هوانا الليلة بيوصل ع كل الدني.
