رغم الظروف الصعبة بيستمر الامل…
بقلب هالمشهد الطبيعي والروحي الساحر، وبعد خمسين سنة غياب، انتفض طير الفينيق ورد الروح لمهرجان الفرح، الحياة والفنون وكانت الإنطلاقة الكبيرة من على كتف غابة أرز الرب لمهرجانات الأرز الدولية.
التحدي كان كبير ولكن النجاح غطى عالتعب وتحقق الإنجاز عام 2015 وضج الأرز بالصوت والنغم والضحكة وكانت ليلات ع اسم الوعد بالأحلى.
صدحت الأصوات بالغنيات اللبنانية، وعالدبكة انشبكت قلوب بمشهد ضوى الجبة ووصل صداه لكل بيت.
عام 2016 زاد الأرز غوى لما صوتها غناه وصاغ الوطن الحلم بغنية.
لمعت أصوات نجمات ونجوم لبنان بمهرجان بيحفظ إلن المطرح والأولوية وكانت ليلات مسمية عالغنية، ملونة بهويتنا برقصة، بموال … من تحت هالأرزة لكل الدني.
عام 2017 توحدت الأصوات تتغني للشجرة الرمز، اللي زرعها ربنها بإيديه تتبقى شاهدة على وطن خالد متل الأخضر ل بشلوحها وثابت متل شلوشها المغروسة بتراب لبنان.
وبنفس السنة احتفلنا بنجاح صوت لبناني شاب، زادتو سنينو العشرة وهج ونضج وحلا.
عام 2018 علي سقف التحدي وكانت الليلة الحدث اللي تابعها اكتر من 13000 شخص لنجمة لبنانية عالمية حملت معها فرح ونجاحات شهرتها بكل العالم.
بين عنجر، صور، جبيل، بعلبك، الوادي المقدس وحرج أرز الرب كان الحدث الاستثنائي وكانت التحية للبنان والتاريخ، للبنان الفخر، الشهادة والاستبسال بالدفاع عن الوطن الرسالة.
رغم كل الظروف الصعبة، هالمهرجان اختار انو يستمر يكون مساحة أمل، واحة فرح، صورة عن الوطن اللي منحبو.
أهل الجبة بعدن بيعاندو الأصعب، أحفاد الأبطال، سكروا المجد وندروا يبقو وتبقى قطعة هالسما ترسم المشهد الأجمل وتكون مهرجان دايم ساكن القلب والذاكرة … ع إسم الأرز، ع إسم العز … ع اسم لبنان.
إيلي أحوش
مصورو مهرجانات الارز اهذه السنة:
- شمعون ضاهر
- الدو ايوب
- فيكتور الفخري
- ربيع جعجع
- زياد رحمه
- كريستال الفخري
- شربل الفخري
- جهاد الحاج
- روجيه ضرغام (فيديو)
- جوني الزغبي(فيديو)
