متل عادتها درجت لجنة مهرجانات الارز الدولية ومن سنة انطلاقها ،على تكريم شخصيات ورموز وطنية لبنانية .وهيدي السنة قررت انو تكرم لبنان ببعدو العالمي من خلال المواقع الاثرية الخمسة المدرجة على لايحة التراث العالمي بلبنان وهي : وادي قاديشا وغابة الارز الدهرية , جبيل , صور , عنجر وبعلبك .
وكرمال يكون التكريم بمستوى بيليق بمكانة لبنان وبمهرجانات الارز الدولية. وايماناً من رئيسة اللجنة النائب ستريدا جعجع بتوجيه رسالة سلام من الارز ومن لبنان للعالم .
منتوجه لكل المغتربين اللبنانيين وللاشقاء العرب، انو يتوافدوا للبنان هيدا الصيف ويشرفونا على قضاء بشري والارز، لانو بلادنا بتتمتع بابهى المواصفات السياحية يلي بتجذب كل سواح العالم . ولانو ما فينا نكون الا رسالة سلام وحياة للعالم .
بدي اعلنلكن خبر سار لهيدا الصيف هوي انو لجنة مهرجانات الارز الدولية ورئيستها سعادة النائب ستريدا جعجع اختاروا الفنانة العالمية شاكيرا اللبنانية الاصل صاحبة سجل حافل من النجاحات العالمية باكثر من 70 مليون اسطوانة منباعة حول العالم ، يلي خلتها تكون من افضل الفنانات بالعالم ، لتحيي حفل افتتاح مهرجانات الارز الدولية لسنتو الرابعة على التوالي، ليلة 13 تموز 2018 ، واللي من المتوقع انو يكون الاضخم على صعيد الشرق الاوسط لهيدا الصيف بتوقعات بتوصل لاكثر من 14000 شخص رح يحضروا هيدي الليلة هالحدث .
وتنكون على قد هيدا الحدث الاضخم بتاريخ منطقة الارز / منطلب من كل اهالينا واصحاب الاوتيلات والمطاعم والمصالح السياحية بمنطقة بشري ، انو يكونوا قلب المهرجان النابض بحسن استقبالن لهل الكم الهائل من الوافدين من مختلف بقع الارض لمنطقتنا . ورح يكون إلي جولة انا ورئيس اتحاد بلديات قضاء بشري ايلي مخلوف على المصالح والمؤسسات السياحية لنتأكد من جودة الخدمة وعلنية الاسعار تتكون منطقتنا مهيئة متل دايما تتكون عند حسن استقبال الوافدين لمنطقتنا تيرجعوا كل سنة لعنا.
وبالختام بدي اشكررئيسة لجنة مهرجانات الارز الدولية النائب ستريدا جعجع على الجهود يلي وضعتها آخر 8 اشهر تتمكن من استضافة هيدا الحدث الفني الكبير, وكمان منشكر اعضاء لجنة مهرجانات الارز الدولية على جهودن تيكون مهرجان الارز على خارطة اهم المهرجانات الدولية بالعالم وبدي اشكر محطة الام تي في بشخص رئيس مجلس ادارتها الاستاذ ميشال المر على المواكبة الدايمة لنجاحاتنا والشكرايضا لشركة ايس لحسن التنظيم و المتابعة الفنية.
كذلك منشكر السيد وسيم صليبي من انغامي انترناشونال على الجهود التي بذلها لانضمام شاكيرا الى مهرجانات الأرز.
