كلمات الاوبريت :

قبل الحرف والعِلم قبل الصفر والرّقم

قبل الحرب قبل السلم قبل العدل قبل الظلم

قبل الوقت قبل الزمان وْمن قبل ما يْكون اللي كان

كنتي حلم للعنفوان وابتدا فيكي الحلم..

مقطع ١ :

أوَّل ما طَلّ النور صَوبٍك ركض غَمْرِك

هَبّ الهوا بخّور صار النَفَس عطرِك

عمر الزمن محفور زنّــار عَ خصرِك

ودْهور خلف دْهور اجتمعو سَوا بْعمرِك

مذهب

يا خضرا يا إمّ الزمن يا جْبين ع الدنيي عِلي

قلب العَلَم تاج الوطن ع رواحنا تْرابِك غِلي..

مقطع ٢ :

إنتي ال بيإيد مْن السما بْهالأرض مزروعة

رْسَمْنا حدودِك بالدِما وْصار الحلم يوعى

وْصرنا غصونك نرْسِما ع قْماش مطبوعة

رايات ع كْتاف الحِمى ع الغيم مرفوعة..

مقطع ٣ :

بْتخلص دني بْتبدا دني وْإنتي بْخُلودِك هَون

يا شامخة وْما بْتنحني للمجد صرتي اللون

يا شاهدِة بْروحِك.. وبْفَيِّة شْـلوحِك.. أوَّل بداية كَــون..

مقطع ٤ :

يا رمز وحْدتن ع الشمس عِلْيانِة رْفيقة بغربتنا وْبالقلب منصانِة

منغيب ومنرجَع حْواليكي نتجمَّع

والسيف عم يلمَع والزند لبناني..

مقطع ٥ :

وحيـاة عـزّك والهَـوا البيغِلّ بغْصونِـك

بهالأرض رح نبقى سَوا نْعَلّي بِنى حْصونِك

وْيوم النِدا بصْفوف ع الموت نمشي ألوف

ونهر البطولة يْطوف برْجال بتْصونِــك..

مقطع ٦ :

ضلّي.. بيهالعالي ما بتنطالي وْعزّك منصان..

كل البدّو يْكون عندِك كان.. قبل الزمان..

صرتي العنوان.. عنوان شعب اختار

إسمك رمز تَصار نور وْكرامِة وْنار

عنوان للبنان.. عنوان للبنان..

مقطع ٧ :

وان هَبّ ليل المعركِـة وْطَلّ التحدّي يْريدنا

وللنار بيصير الحكي بتزلـغـط بْـواريدنــا

وان يوم يندَهنا النِدا لأجلِك يا عزّ بْلادِنا

لعْيونِك يْطيب الفِدا بأرواحِنا ووْلادِنا

فوق تْرابك سهل وْجبل يسقط بطل ينبت بطل

لا تخافي يا إمّ الأزل ما الموت لعبِة بْإيدنـا..

الشاعر: نزار فرنسيس