السيدة ألين طوق رئيسة جمعية ” فرصة للحياة “:  ” حلمنا كبير كتير وبعدنا بأوّل الطريق ….”

الموضوع الثالث: الشباب والمجتمع المدني –

بال 2015 كنت مسؤولة قسم الإبتدائي والروضات بمدرسة راهبات القديسة تريزيا حدشيت لمّا قالتلنا الريسة آنذاك إنو في عنّا دورة تدريبية مدّتها 3 أيام. بطبيعة الحال أنا وزملائي انزعجنا لأنو تعبنا من كترة الحكي وقلّة الحلول لمواجهة تحدّيات التربية وصعوبات التعامل مع التلاميذ. وأنا بشكل خاص كان عندي آمال كتير كبيرة وضعتها بالتربية وبدوري كمسؤولة قسم لأنو كنت عارفة إنو الإنماء ببشري والمنطقة بيبلّش من هون, وكانت آمالي عم تنكسر يوم بعد يوم وقت لي بلشت اخسر معركة ورا معركة مع الأهل والتلاميذ والإدارة والمعلمين.    

جينا على هيدي الدورة وقالولنا هيدي من تنظيم جمعية فرصة للحياة وأنا وقتها ما تخيّلت إنو الدورة رح تكون إلي فعلاً فرصة للحياة.             

ما معي وقت خبّركن تفاصيل هيدي الدورة ولكن بقدر قلكن إنّي خلقت من جديد من بعدها وإنّو تغيّرت نظرتي للحياة وللتربية وللمجتمع لدرجة إنو خلال فترة أسابيع غيّرت  جذريا طرق التربية والتواصل والتعامل مع الأولاد والأهل بالمدرسة وأخدنا وقتها نتائج سريعة وملموسة لدرجة إنو وقت بتذكر خبرتي بمدرسة حدشيت بوصفها بالسحر.  

بعدها سألت عن جمعية فرصة للحياة وقالولي تأسست سنة 2013  بمبادرة من النائبي ستريدا جعجع وإيلي كيروز ورئيستها السيدة ديامان رحمه وأهدافها الوقاية من المخدرات والإنحرافات الإجتماعية لدى الشباب في منطقة بشري. وإنّو بلّشت مسيرتها بالتعاون مع تجمّع ” امّ النور” واخصّائيين طرحوا على الجمعية برنامج تربوي تنموي مبني على التربية على مهارات الحياة متل التواصل اللاعنفي, وبناء العلاقات, وتقدير الذات, وبناء القدرات, والتشجيع على الخلق والإبداع…             

لأنو برهنت جميع الدراسات والخبرات حول العالم إنو إذا بدنا نبني مجتمع خالي من الإنحرافات ما بينفع الردع ولا المعالجة ولا حتى التوعية. إنما يجب إعطاء الإنسان فرصة ينما ويعيش الحياة بل ملء الحياة.    

وهيدا اللي عم تعملو حاليا جمعية فرصة للحياة بإمكانياتها المتواضعة ب7 مدارس بقضاء بشري وعدد من الجمعيات اللي بتتعامل مع الأولاد والشباب.     

بالأرقام فينا نقول إنو ب4 سنين نظّمت الجمعية 16 دورة تدريبية كلّ دورة مدّتا 3 أيام إضافة إلى متابعة تطبيق البرنامج التربوي بشكل دوري. عمليا استفاد أكثر من 220 شخص من معلمين وأهل ومربيين وهذا ينعكس على أكثر من 1500 ولد في القضاء. وقت اللي شفت هالإندفاع وهالإيمان بالحياة والحبّ لبشري وللمنطقة فهمت إنني أخيرا لقيت مكان بقدر حقّق فيه حلمي التربوي والتنموي لبشري, لقيت هالقوس يللي تحدث عنه جبران بنصّه ” أولادكم ليسوا لكم” وطلبت الإنتساب إلى جمعية فرصة للحياة  عملا ً بكلام جبران خليل جبران اللي بيقول فيه :               

ليكنُ التوائي بين يدي رامي السهام لأجل المسرّة والغبطة.

حلمنا كبير كتير وبعدنا بأوّل الطريق.         

فرصة للحياة بتشوف منطقة بشري عمراني بشعبها متل ما تتعمر بحجرها.     

بتشوف منطقة بشري مكان للثقافة والعلم والمعرفة, مكان للإبداع والفرح والنجاح   

بتشوف منطقة بشري مكان بيحلى فيه الحياة.    

بقول الكاتب الفرنسي Antoine de Saint Exupery ” إذا بدك تصنع سفينة ما تجمع رجالك وتعطيون عدّة ولواح خشب وتشرحلن كيف يشتغلوا…إذا بدك تصنع سفينة, ازرع بقلوبهن حبّ البحر ورغبة الإبحار” ونحنا من قول إذا بدّكن منطقة بشري تنما ربّي ولادا على حبّ الأرض ورغبة الحياة.      

بدي وجه تحية لأعضاء الهيئة الإدارية: السيدة ديامان رحمه ، الصديق سمير كيروز, الpsychotherapeute  منى اسطفان فخري, الصديق حنا رحمه, الأب خليل رحمه, المختار فادي الشدياق  والأستاذ غازي جعحع. وبحب أشكر نائبي منطقة بشري السيدة ستريدا جعجع والاستاذ إيلي كيروز  وكلّ البلديات والمدارس والمؤسسات والأشخاص يللي عم يدعمونا, وكلّ حدا بدّو يساهم معنا مستقبليا لحتى حلمنا يصير حقيقة.

                نص الفيلم الوثائقي الذي عرض عن فرصة حياة

إنمائي في انتمائي
انتمائي لذاتي
انتمائي لانسانيتي
انتمائي لكرامتي
انتمائي لأرضي
انتمائي لطبيعتي
انتمائي لمستقبلي …
انتمائي للحب
انتمائي للأمل
انتمائي للحياة
“فرصة للحياة“
هيدي فرصة … ليك ملا فرصة
فرصة تشرب … من كاس الحب وتسكر بالسعادة ، السعادة خلقتلك
فرصة تشم … بخور الوادي وريحان الارز الأبيض
فرصة تشك … بوعيك مفهوم جديد بيكبر فيك  وبيكبرك
فرصة تتعاطى … وما تخرم من الثقة بذاتك ، رغم الألم
فرصة تطير … وتطحن كل الأفكار اللي خلتك ضعيف ومستهتر بالدني
لأنك إنت بتسوا الدني
لأنك انت إلك خلقت الدني
لأنك إنت إلك كل الحياة
لأنك إنت إلك ” فرصة للحياة “

كلمات سمير كيروز

صوت ميشال كيروز

اخراج طوني كيروز